Sunday, January 24, 2010

ცხელ გულზე

"ომი და ქორწილი"
სცენარისტები: პაატა ბერიკაშვილი,ნანა ჭავჭანიძე, ნათია გოგოჭური
რეჟისორი: ზაზა კოლელიშვილი
ოპერატორი: მინდია ესაძე
მხატვარი: მალხაზ კუხაშვილი
როლებში: ელენე კოლელიშვილი, როლანდ ოქროპირიძე, გივი ჩუგუაშვილი, აკაკი ხიდაშელი, ქართლოს მარადიშვილი, დავით ხურცილავა, დუტა სხირტლაძე, ბადრი კაკაბაძე, გრიგოლ წიტაიშვილი და სხვები.

კიდევ ერთი ქართული ფილმის პრემიერა. ამჯერად, თემა გაცილებით სერიოზულია - გუშინდელი ომის ისტორია. ისტორია, როგორც ავტორები გვეუბნებიან, რეალური - აგვისტოს ომის დროს ერთ-ერთ ქართულ სოფელში მართლაც გადაიხადეს ქორწილი.
რეალური ამბები თუ პერსონაჟები სხვაც ბევრია ამ ფილმში - ბევრჯერ მოსმენილი ოფიციალური თუ არაოფიციალური წყაროებიდან: საქართველოში გაზრდილი რუსი გენერალი თუ რუსის ჯარში მომსახურე ქართველი გენერალი, "ცუდი" ოსები თუ "კარგი" ოსები, დაბნეული რეზერვისტები თუ მოკლული უცხოელი ჟურნალისტი, გადამწვარი სახლები თუ დახვრეტილი მშვიდობიანი მოსახლეობა, სარდაფებიდან გამოტანილი არაყის ბოცები თუ ყბადაღებული უნიტაზები.... ბევრია, ძალზე ბევრი...
ამბები იმდენად მტკივნეულია, რომ ესთეტიკური განცდისთვის ადგილი აღარც რჩება, მას უშუალო ემოციები ფარავს. გასაგებია, რომ ამ სიტუაციაში იყვნენ ალბათ ავტორებიც. ცხელ გულზე მათ მეტისმეტად ბევრის, თითქმის ყველაფრის ერთად ჩადება მოინდომეს ფილმში - გაგონილის, ნანახის, მოსმენილის თუ წაკითხულის, განცდილი ტკივილის, ბრაზის, სინანულის... როგორც ჩანს, მასალის ესთეტიკური გადამუშავებისთვის აღარც მათ დარჩათ დრო და ადგილი.
ალბათ ამიტომ ჟღერს ბევრი ფრაზა ლოზუნგივით და ბევრი პერსონაჟი ყოფითი საუბრებიდან გადმოსულ შტამპებად გამოიყურება, ამიტომ არ იწვევს სიცილს „მტრების“ კარიკატურული სახეები და გროტესკული სცენები, ხშირად ტკივილსაც იმედგაცრუების გემო დაჰყვება...
რას ვიზამთ, რთულია ხელოვნების ბილიკებზე სიარული. ერთით კი შეგვიძლია ვინუგეშოთ თავი, ფილმი ნამდვილად კეთილშობილური მიზნებით და ცხელი გულით არის გადაღებული, რასაც ვერ ვიტყვით ბევრ ბოლოდროინდელ ქართულ ფილმზე.
პოპკორნი კი... წესით პოპკორნი არც უნდა გაგახსენდეს...
მ.ლ.

No comments: